Anueche volví a ver la película "Good Bye, Lenin".
Pal que nun la viera tovía, que nun siga lleendo porque voi a destripá-yla.
El protagonista ye un rapaz, fíu d'una fiel militante'l Partíu
Socialista Unificáu de la RDA. A la madre, péga-y un "pedrocarrascu"
n'ochobre de 1989 y queda en coma a lo llargo d'ocho meses. Mientres ta la
probe ente Candás y Lluanco, cai el muru de Berlín y entama a medrar el
capitalismu, camín de la reunificación alemana, a pasos "axitanaos",
como dicía un paisanu. Escontra tolos pronósticos, la muyer sal del coma, pero
col coral tan feble que'l mínimu sustu podría matala. Entós, el protagonista
decide facer como si nenguna d'estes coses pasara y siguieran viviendo nun
estáu socialista. Convierte'l pisu familiar nel últimu reductu de l'Alemaña
d'Erich Honecker.
Siempre que veo esti filme, pienso en como sería la versión
española, "Good Bye, Pachu". La cosa podía ser más o menos asina,
escondiéndo-y a la madre los Interviús pa que nun s'enterara del destape,
quitándo-y la segunda cadena (el UHF) pa que nun viera "La Clave",
camuflando los productos multinacionales dientro de los vieyos tarros de les
autárquiques marques patries...
L'esconsueñu de la madre podía llevanos al 23F, pa poder
sentir les marches militares na radio, seis años. Más complicao sería recrear
la escena cumal de la película, na que vese un helicópteru llevando colingada
una estatua de Lenin, qu'al pasar delantre la madre, paez mira-y a los güeyos y
dicí-y adiós. Na versión española, viendo cuando entamaron a quitar los
muñeconos del ferrolanu, llevaríanos a tener en coma a la paisana treinta o
treintaicinco años.
Nada, que diba ser un truñu de película, porque a una
franquistona d'esa dómina, de xuru que-y prestaría ver qu'España Una Grande y
Libre sigue en manes d'ellos.
A diferencia de la versión orixinal, lo que nun dexó Pachu
foi un estáu dividíu y pendiente d'una reunificación.
¿O sí?