ENTREVISTA EN LA VAINA

Una entrevista que me fixo'l mio collaciu Javi Lueje el día de la firma d'exemplares en La Vaina, Xixón.

DE GLAYÍOS Y CHILLÍOS

La escultura de Chillida vendía como chatarra por 30 €.

-Ye mui curiosu'l tema l'arte, tolo que da de falar, d'esfalanciar, d'escribir, la de perres que mueve, pero la so ensencia mesma, munches veces escápasenos. Muncho llevo discutío dende qu'estudié n'Artes y Oficios del 88 al 90 (qu'agora llámenlo "Escuela d'Artes" nun vaigan confundilos con trabayadores) na primer promoción del bachilleratu artísticu n'Asturies, al rodiu de qué ye eso del arte. Ún de los más necios a la hora de discutir de too esto ye'l mio queríu y  non por ello menos pelma Miguel Rojo.  Tenemos a toles nuestres amistaes frites col tema. Discutiendo con esti collaciu, al qu'almiro como creador y quiero fegadalmente, enxamás pasamos del primer  asaltu , "la definición", a mi préstame muncho poneme estupendu depués de tomar unos culinos, a lo Fernando Arrabal col so famosu:

-El mineralismu va a llegarrrr!!!

Pero xuro que namás intento dar la definición que diz el ciccionariu de l'Academia de la Llingua Asturiana (-Acción humana pa espresar idees, emociones, percepciones, conceptos etc. per mediu de recursos plásticos, llingüísticos o sonoros. Más o menos) A lo qu'amiesto lo que dicen la mayoría de los antropólogos: los rasgos fundamentales que diferencien a les persones de los animales son la consciencia, la ellaboración de mensaxes complexos y la cultura (entendiendo cultura como esa riestra de deprendimientos que pasen d'una xeneración a otra y que nun se lleven nos xenes). Too esto, na estaya na que meyor ta reflexao nel so conxuntu ye nel fechu artísticu. Un animal fai arquitectures, tien estructures polítiques, exércitos, medicina... pero nun tien capacidá artística (val, sigún Punset y el mio collaciu Isidro hai unos paxarinos qu'acuriosen el ñeru con un xacíu mui estéticu). Resumiendo, lo que más nos alloña de los animales ye esa capacidá artística, ye lo que nos fai más humanos.

Estes son les movides que nos dedicamos a discutir peles sidreríes, porque tando como ta l'Sporting...

 

Caro qu'esti día, garro'l periódicu y veo lo del camión que robaron con obres de nun sé cuantos artistes, Botero, Saura, Tapies, Picasso, Chillida, etc. Y depués d'oyer al galerista diciendo que yera un robu bien pensáu, fechu por profesionales... ¡Ai mamina que me mexo! Lleo unos díes depués que nin profesionales nin hosties, yeren una reciella manguanes qu'intentaron vender una escultura de Chillida nuna chatarrería al pesu, por 30 loros.

 

Esto sí que me dió que pensar, fuera de les grandilocuencies creatives, de los egos perinflaos, de les obrones culturalones con mayúscules, esto sí qu'humaniza al arte, un chorizu pal qu'un fierru ye un fierru. Humaniza al arte, pero al chorizu ¿humanízalu o animalízalu? Nun lo tengo mui claro.

PD: Namás quiero facer una confesión p'acabar esta entrada. Yo tamién tuve una etapa Oteizo-Chillidesca na facultá, de la que fice la especialidá d'escultura y dende entós arrastro fierronos tochamente soldaos de mudanza en mudanza y yá llevo unes cuantes. Por favor, que me den el númeru de la chatarrería esa que-yos les vendo toes al pesu. Sedría la mio única posibilidá de cotizame a la vera de Chillida.

MANZAJÚ Y WEB

Toi un pelín vagu col tema'l blog. La verdá ye qu'impúseme un arrestu domiciliariu pa tener preparada la web del mio grupu, Felpeyu a primeros d'añu. Namás salí a una firma d'exemplares nel chigre La Vaina de Xixón, que tuvo mui prestosa, con muncha xente conocío y un ambiente familiar. Val, tamién salí a una cena colos collacios a base de centollos y cava, pero esa ye otra historia. El casu ye que con tol tema esti del Manzajú, el mio profesor de diseñu web, Iván Cepedal, apurrióme un anunciu de Manzajú nel ABC nos años 70, nel qu'apaez la botellina auténtica del Manzajú que bebíemos n'aquella dómina. La botella que yo usé pa los dibuxos ye tamién d'un productu de la marca Escanciador pero ye diferente, siempre pasen estes cose, tas tiempu buscando una cosa y apaez a la fin cuando yá nun hai remediu. Habrá qu'esperar a una nueva edición pa poner la botella que correspuende. Fe d'errores.

PRESENTACIÓN MANZAJÚ

Ando col blog un pelín desatendíu, munchu trabayu y munchu cursu últimamente. Prometo mayor actividá a partir del 1 d'avientu. Toi acabante de facer la presentación del mio cómic "Manzajú", dientro de Festival de Cine de Xixón y salieron delles entrevistes y artículos na prensa rexonal, qu'igual vos prestaba lleer. Tendrévos avisaos del día que faiga una xornadina de firmes.


Besos y gracies.

RUMA


Artículu del mio collaciu Miguel Rojo en El Comercio:

http://www.elcomerciodigital.com/v/20101122/cultura/cosecha-manzaju-ruma-barbero-20101122.html

Entrevista de Ana Zapico en El Comercio:

http://www.elcomerciodigital.com/20101121/mas-actualidad/cultura/comic-201011211151.html

Antón García en La Nueva España:

http://www.lne.es/cultura/2010/11/19/pisar-memoria-pa-saca-zume/996079.html

Entrevista en Asturies.com:


http://www.asturies.com/node/13937

Entrevista en Les Noticies:

http://www.lesnoticies.com/lesnoticies/noticies/ruma-barbero-tovia-considera-poco-friki-llector-comics/7348

SAHARA LLIBRE

De la que trabayo suelo tar enchufáu a los cascos, col Spotify normalmente, pero dalguna vez tamién siento dalgún podcast d'emisores de radio. El mes pasáu, descubrióme'l mio collaciu Antón una ñata de programes mui prestosos, del programa Documentos de Radio Nacional de España. Nesti programa, podéis atopar documentales radiofónicos mui prestosos, nos que falen historiadores y xente que tuvo que ver col tema que tean tratando en cada momentu. Por exemplu, yo tuve oyendo un documentu de la revolución cubana, otru de Gardel y el que vos dexo equí col tema tan d'actualidá como ye'l Sahara y la so descolonización por parte d'España. Ye perinteresante sentir como falaba Felipe González a los saharauis enantes d'entrar nel gobiernu, minutu 50 más o menos. Que valga como recordatoriu d'un conflictu llatente, nuna tierra que pa les naciones xuníes sigue tando baxo alministración española.

Sahara 1975. Bidanis en el laberinto de las arenas (Documentos RNE)

MANZAJÚ

Dende que punxe a furrular esti blog, a la fin una entrada na que falo d'un trabayu propiu. Acaba de salir d'imprenta'l cómic "Manzajú", col que gané l'añu pasáu'l premiu "Alfonso Iglesias de Cómic" entamáu pola Conseyería de Cultura. Esti premiu, vieno a sumase a los premios lliterarios en llingua asturiana que yá había, ensayu, novela, poesía y lliteratura infantil. Tuvo dotáu con cierta cantidá económica (al que-y interese la cantidá ta nel BOPA) y la publicación de la obra. Pues esto ye, tovía nun sé si tardará en tar nes tiendes, namás sé que va facése la presentación el 23 d'esti mes de payares dientro de la programación del Festival de Cine de Xixón, yá vos confirmaré hora y llugar.

PD: agora podéis poneme a parir como faigo yo coles obres d'otros dientro d'esti blog.

DE PACO IBAÑEZ A LOU REED

 El sábadu tuve na fiesta de cumpleaños de Ali, la mio compañera nel caleyar de les oposiciones de secundaria del añu pasáu. Na fiesta había que dir antroxáu, pero nun voi cuntavos de que fui yo. Como ye vezu nestes fiestes de pisos, al estilu de les que facíemos de la que yéremos universitarios, les tertulies más interesantes tan siempre na cocina y ellí ye onde tuve yo casi tol tiempu. Una de les charres, yera alrodiu de los cantautores, había unu de cuerpu presente, Toli Morilla, que tampoco voi dicir el mazcaritu que llevaba. Tábemos ellí Manuel, Compai, Ester, Ferni y yo.  Falando del mayestru "Paco Ibañez", Ester y yo cuntábemos lo que nos emocionó sentilu nel Xovellanos hai unos años y Ferni (el nomatu familiar del mio collaciu dende fai 22 años y gran artista Fernando Gutiérrez, ver: http://www.laboralcentrodearte.org/exhibitions/show/86) dicía que cómo podíemos soportar eso, bla, bla, bla.  Falamos de Bob Dylan, al que toos reconocimos como'l más grande o como mínimo'l padre de la movida (el güelu ye Pete Seeger) y tamién nos acordamos de Lou Reed y de Moe Tucker la batería de la Velvet Underground, qu'hai poco salió nos periódicos que sofitaba un actu del Tea Party. Cual nun sedría la mio sorpresa esta mañana cuando lleo nel periódicu que Lou Reed ta averándose tamién al Tea Party, buscando per internet Lou Reed y Moe Tucker niéguenlo, pero yá quedó la dulda. 

Yo faigome la entruga ¿cómo escribe un lliteratu de dereches y unu d'izquierdes? El d'izquierdes fala de  lluchar a la escontra del opresor y les inxusticies, buscar un mundu meyor, amor, alianza de civilizaciones...  Ye evidente que'l de dereches tienlo peor, nun va a escribir una oda a la esplotación de los obreros, llanzar mensaxes racistes, amor a les perres (de dineru quiero dicir) y dir camín d'un mundu mas desigual y contamináu., entós ye cuando escribe de los placeres de la vida, les drogues y el sexu...

Drogues y sexu, esos son los temes que más-y presten a un escritor de dereches como Sánchez Dragó y curiosamente, tamién a Lou Reed. ¿A ver si va ser verdá lo del Tea Party?

PD: Déxovos "La Poesía Es Un Arma Cargada De Futuro" de Gabriel Celaya, musicada pol mayestru Paco Ibañez (Ferni, siéntela coles oreyes abiertes). Abaxo déxovos el cantar "Venus in Furs" del tamién mayestru Lou Reed pa la Velvet Underground, que si-y pones un par de xaponesines de 13 años, podía firmalu Dragó tan panchu.

VENUS IN FURS

 

Brillante brillante botes de cueru brillante
La neña del llátigu no oscuro

El to siervu vien con cascabelinos colingando, nun lu rechaces
Gólpia-y querida señorina y sana'l so coral
Dulces pecaos de fantasíes de lluz caleyera
Tracen los vistíos qu'usará ella 
Pelleyos de martaleña adórnenla imperiosamente
Severín Severín esperate ellí

Toi cansáu, toi aburríu
Podía durmir milenta años
Milenta suaños diben despertame
Dellos colores fechos de llárimes

Besa la bota de cueru brillante brillante
Cueru brillante no oscuro
Llingua de cueru, el currión que t'espera
Gólpia-yos querida señorina y sana'l so coral

Severín Severín fala tan selemente 

Severín puestu de rodielles
Preba'l llátigu nun amor que nun se da a lo xo 

Preba'l llátigu y llueu suplícame

Brillante brillante botes de cueru brillante
La neña del llátigu no oscuro

El to siervu vien con cascabelinos colingando, por favor, nun lu rechaces
Gólpia-y querida señorina y sana'l so coral

LO QU'ENXAMÁS TENDRÁ'L NIEMEYER

Déxovos equí'l videu que m'apurrió Glorina, como refuerzu de la entrada de más abaxo.
El platiellu volante del Niemeyer d'Avilés, mui al nuestru pesar, nun va tener enxamás un momentu históricu del cine patriu como ye esti, la cabera escena de la película TOBI.
PD: n'alcordanza del platiellu volante del parque d'atracciones de Madrid.

MAMINA, MAMINA!!!

Tuve esti día viendo una película, nel centru cultural Xixón sur, de les que ponen dientro de ciclos entamaos pola xente'l festival de cine. La película en cuestión yera "Le refuge" ( "L'abellugu" na fala de Pin de Pría ) un filme francés que venía de ganar l'añu pasáu el "Premiu Especial del XURÁU del Festival de Donosti". La peli ye la historia d'una de moza, mui curiosa ella,  qu'anda toda "enyonquicía" a la que-y muerre'l mozu, un pih.ucu parisín de munches perres mui curiosu, d'una sobredosis. Entós, ella esconsona nel hospital y... ¡Ai fía! ta preñada. La ma d'él, muyer facha mui gabacha, diz-y qu'albuerte, que ta too pago ( namás-y faltó dicir: -¡Cago'n mi madre! ). Pero la neña nun lo fai, necia ella, marcha pa una casina n'Iparralde a rascar el ratu y pasear el preñazu peles playes d'Euzkalerría. Entós llega l'hermanu'l mozu, tamién mui curiosu (nesti filme tan toos mui curiosos) col que nun tenía muncha relación y métese en casa con ella. Pregúnta-y'l cuñáu pola casa y ella diz-y que ye d'un vieyu que-y echó un polvu cuando tenía dieciséis años. ¿Sería Dragó? Non, un pelín vieya pa Dragó. Aparez el mozu que-y fai los recaos a la neña y enróllase col cuñáu. Ella, nun sabemos si celosa, va pal pueblu a tomar una cañina y marcha con un home de mediana edá al que-y ponen pinochón les preñaes, dizlo él, yo nun m'invento nada. Depués otru rollucu nuna discoteca pa a la fin acabar cepillándose al cuñáu gaier.  ¡Ah! casi se m'escaez, paseando pela playa, éntra-y una chifladona qu'entama a masuña-y'l banduyu y que nun lleva una hostia de milagru. Namás tener a la guah.a, mientres la tien en brazos el cuñáu, escapa cola vieya escusa de: -Voi echar un pitu.

La película ye como si garres un guión d'Almodovar, páseslu pela Turmix de Julio Meden y resuelves el 90% con primeros planos y planos medios, pero ensin la personalidá d'Almodovar o Meden. Resultáu, una especie de telefilme de los qu'echaben nes tardes ochenteres de la primera cadena de TVE n'aquellos telefilmes d'estrenos TV.

Alcordeme del mio collaciu Boni cuando diz de los personaxes d'Almodovar: -¿A que se dediquen, de que trabayen?

Ayer, falando coles mios amigues Gloria y Arantxa, que me daben la razón na crítica fílmica, ocurrióseme dicir: -Lo que foi'l cine francés y lo que ye. Riéronse de mi diciendo: -L'espertu en cine francés. Val, nun se muncho del cine actual francés, conozo poco más que les películes comerciales de Kiewsloski,  Jeunet y Jean Jacques Annaud. Pero nun hai que saber muncho de Renoir, Truffaut o Godard, nin tener en casa los "Cahiers du Cinema" pa dase cuenta de qu'esta película val pa poner depués d'un programa d'Ana Rosa Quintana y poco más.

El XURÁU de Donosti, ¿en que taba pensando cuando-y dió'l premiu especial a esta película? namás se m'ocurren dos opciones:

1- Taben llevaos pol sentimientu nacionaliegu, con eso de que los personaxes veraneen nel País Vascu francés, como la ETA.

2- El XURÁU tuvo tol festival de pintxos per Donosti y dió'l premiu a bultu, l'últimu día, endolcaos nuna resaca de txacolí, ensin ver ninguna película.

Na mio humilde opinión, nu sé si considerala dientro de la categoría de "Forru Polar" o la de "Callu Malayu".

NOTAS AL PIE DE GAZA

Vuelvo dexar equí una recomendación, el cómic del mayestru del cómic-documental o cómic-periodísticu Joe Sacco "Notas al pie de Gaza" (Editorial Random House Mondadori) editáu nos Estaos Xuníos l'añu pasáu y n'abril de 2010 na so versión española. Tremendu trabayu'l de Sacco, depués de les sos obres "Palestina: en la franja de Gaza (1995)", "Gorazde: zona protegida (2000)" y "El negociador (2001)", ruempe'l so silenciu editando una obra de 430 páxines. Nesta ocasión, vuelve a Palestina pa cuntar una hestoria que-y quedó nel tinteru cuando fixo'l primer llibru de Palestina, la matanza de 300 civiles palestinos en 1956. Como ye vezu nél, hai veces que pon en dulda les versiones que-y cunten, otres contrasta les partes nes que nun coinciden unos y otros. Otres veces, de la que reflexa'l presente, salen persones diciéndo-y que pa que va falar del pasáu, que lo del 1956 sigue pasando anguaño en Gaza y él mesmu sintiéndose un miserable por andar furando nes feríes de los vieyos. Pero esi presente ta ehí a lo llargo de tol cómic, de la que van caminando a la gueta d'un testigu de la matanza, de la que va a ver les cases que va tirando l'exercitu israelí colos sos buldocers, de la qu'escapa de nueche p'ente les cais, colos sos collacios palestinos. Nesti trabayu, vemos a un Sacco muncho muncho más implicáu, si cabe.

No que cinca a la narrativa, partiendo d'un filu argumental tan bestial, va desgranándolu pali que pali y ensin recrease, ye más duro lo que nun vemos, anque nun escatima detalles si ye necesario.

Estéticamente'l dibuxu d'esti llibru, ye igual de duru y espresivu que nos sos primeros trabayos, sigue tendiendo al barroquismu recargando toles planches hasta'l mínimu detalle, pero pal mio gustu muncho meyor al ser un pelín más llimpiu, con una llínia más clara y fácil de siguir.Ye esti un cómic mui recomendable pal que quiera afondar na historia de Palestina y de pasu pa los que tendemos a xeneralizar colos yanquis, lleendo a un autor norteamericanu más que comprometíu coles causes xustes. Parafraseando a lo que dixo Trueba de Billy Wilder: -Nun creo en dios pero creo en Joe Sacco.

Una obra seria y madura, merecedora de llevar un premiu Pulitzer.

RENOVASE O MORRER

Taba esti día falando con unos collacios de los asuntos sucesorios, chando unes rises como ye vezu entre nosotros. Nun sólo falábemos de la sucesión en Corea'l Norte, tamién salió'l tema de Tomás Gómez y Trinidad Jiménez, del "Moñarca" y el so fíu "El Maizón", de la presidencia asturiana... Pero de toles sucesiones la que nos paecía la más difícil yera la del ministeriu de trabayu, nesti momentazu nel que tamos. Sacamos en conclusión que'l puntu que tuviera que comese esi panchu tenía que ser un home del partíu ensin fisures, mansu, llamberregañes dende'l tobiellu al pescuezu y toos coincidimos nel candidatu ideal pa ello, "El Presidente Vicente". A la fin el señor Zapatero volvió a decepcionanos otra vegada, dexonos o "Porky" en casa hasta la xubilación y baraxó casi tolos ministerios. Como diz el son cubanu: "..quítate tú pa ponerme yo...". D'un plumazu llantonos a la neña del "Acontecimientu Planetariu" en "Sanidá", movió a la "Señorita Trini" p'asuntos más esteriores que la comunidá del "Chotís" y punxo a Rosa Aguilar (notru tiempu gran esperanza blanca d'Izquierda Xunida) al mandu del "Mediu Ambiente".

L'amigu Mariano debe tar garrando carrera pa entrar a la Moncloa en plancha, como naquel anunciu de los ochenta: -Tú pasas el Pronto y yo el paño.

Tremendu país de mediocres.

Nun sé a vosotros, a mi quédame namás el consuelu de mirar pa esta semeya que topé hai poco na rede y que ye la mio favorita desti mes.

ATACAMA

Llamóme l'atención, viendo qu'unu de los mineros chilenos que salíen ayer depués de 70 díes atrapaos tenía 63 años, namás cuatro menos que "Villa" (el del SOMA, nun confundir col fubolista). Villa, esi ser faltosu adornáu con mórsicu bigote, que lo más que fixo ye conseguir prexubilaciones a los 40 años pa los d'él, ensin intentar qu'eses perres foran inversiones na so cuenca. Villa, esi personaxe que lleva más tiempu de lliberáu sindical que lo que trabayó. Villa, esa cara de cementu armáu, al que-y da lo mesmo ser diputáu o senador del PSOE pa trancase en ministeriu d'industria cola so guardia pretoriana. Villa, esa mente pensante qu'ante l'aumentu d'accidentes n'autovía minera por mor de los xabalinos, propunxo dar permisu a los prexubilaos d'Hunosa pa cazar a la vera la carretera. Villa, esi puntu que como cantaba Cecilia, si por el fuere: "...sería la novia en la boda,/ el niño en el bautizo,/ el muerto en el entierro,/ con tal de dejar su sello". Nun quiero nin pensar si lleguen a tener que sacar d'una mina a Villa y a los sos fartucos collacios del sindicatu, diben tener que facer un furacu como'l tunel del Negrón.

Escribió Pablo Neruda, falando de los mineros de Atacama: “El cobre ahí/ dormido. / Son los cerros del Norte/ desolado. / Desde arriba/ las cumbres del cobre, / cicatrices hurañas, / mantos verdes, /cúpulas carcomidas por el ímpetu /abrasador del tiempo, / cerca de nosotros/ la mina: / la mina es sólo el hombre, /no sale /de la tierra /el mineral, /sale del pecho humano…"

POR NUESTRA CUENTA

Por Nuestra cuenta, de Miriam Katin. Editorial: Ponent Mon 2006

Hai pocu tiempu que retomé'l vezu d'intercambiar tebeos col mio collaciu Paco, lo que facilita averase munches veces a obres interesantes. Ye'l casu d'esti llibru de l'autora Miriam Katin, xudia ñacía n'Hungría, nel que fala de como consiguieron ella y la so ma sobrevivir a la invasión nazi y a la posterior "lliberación" de los soviéticos. En cuanto a la temática, coincide col clásicu de Art Spiegelman "Maus", una güeyada atrás pa cuntar esperiencies paternofiliales, nesti casu maternofiliales, na segunda guerra mundial. Tamién tien que ver cola obra de Marjane Satrapi "Persépolis" y de Izeina Abirached "El vuelo de las golondrinas" (otros dos perbonos exemplos d'autores femenines de cómic), no que cinca al puntu de vista narrativu; la visión d'un conflictu armáu cuntáu dende la infancia. Técnicamente ye muncho más clásicu qu'estos exemplos, ta dibuxáu con grafito, lo qu'ayuda a crear el clima gris d'aquella dómina y nalguna páxina, na que fala de la so vida como madre en Nueva York, usa los llápices de colores. Por pone-y dalgún defectu, parezme que s'echen de menos testos d'apoyu o elipsis visuales nos saltos temporales, yá que fáenseme un pelín bruscos. Lo meyor d'esti llibru, ye como nos cuenta'l so andar pel camín del ateismu, dende una neña beata hasta'l so descreyimientu de dios.

UNA VIDA EN CHINA

Dexo equí una referencia d'ún de los últimos cómics que lleí, "Una vida en china" (Astiberri 2010). Otra perguapa referencia dientro'l cómic autobiográficu, xéneru que vien ufiertándonos grandes obres de quince años p'acá. Li Kunwu, nacíu nel 1955, miembru del partíu comunista chinu y dibuxante propagandista a lo llargo de 30 años, cúntanos nesti primer llibru, col sofitu del guionista P.Ôtie, la so vida na China de Mao, dende que ye un neñu hasta que muerre Mao. Equí podemos ver que coses pasen cuando faes esperimentos (preba, error, rectificación...) con un país de mil millones de persones envede facelos en casa y con gaseosa. Un trabayu mui prestosu pal que-y llame l'atención esi acoyonante país y quiera afondar más nos oríxenes político-ideolóxicos de Federico Jiménez Losantos (ex-maoista).

¿Nun va dicilo naide?

Llevo dándo-y vueltes a esti asuntu dende que vi los primeros dibuxos del proyectu de Niemeyer p'Avilés y dándo-yos el coñazu a los mios collacios colo que me parez la obra d'esti señor. Vamos ver, Niemeyer ye l'arquitectu que se fizo famosu pol proyectu d'esa gran "Perlorona" que ye Brasilia, una ciudá diseñada con un gustu más que cuestionable a entamos de los 60 y qu'en 10 años taba yá más pasada que la Mirinda. Tovía m'alcuerdo de la qu'estudié al Niemeyer na facultá, les rises qu'echábemos a cuenta de la horterada d'edificios que facía esti bon paisanu. Pero nada, equí somos más grandonos que naide y envede dexar a esi probe paisanu vivir tranquilín los sos caberos años (el bonu d'Oscar tien 103 años) al calorín brasileñu, dando paseinos... van estos "fangios" de la "Fundación Príncipe" a revolvelu, primero que si un premiu, depués que si: -Fainos un proyectín... Y caro, que va dicir esti home, venga faigovoslu y equí tal resultáu, una cupulona asemeyada a la tristemente desaparecía discoteca Tik de La Guía (Xixón) con un chigre-platielluvolante calcáu al del parque d'atracciones de Madrid, que tamién dió colos sos cimientos en suelu l'añu pasáu. ¿Qué ye qu'hasta la dirección del parque d'atracciones de Madrid tien un gustu más refináu que la fundación de los premios principiegos y el gobiernín? Yá puestos, ¿Por qué nun-y mercaron el platiellu a los madrilanos? A fin de cuentes yera un edificiu históricu que, cuidadín, salía en películes de la talla de "Tobi" y "Las aventuras de Parchís", filmes a la altura de les últimes películes del tamién "Premiu Príncipe" Woody Allen.

Y ante tamaña macarrada arquitectónica, naide s'atreve a dicir nada, esto ye como'l cuentu del traxe nuevu del emperador. Pero MIRÁI por dios que ventanes d'aluminiu, ¡Cago'n ros! Eses ventanes valen pa una cafetería d'El Berrón (con perdón a los propietarios de cafeteríes d'El Berrón) pero non pa un edificiu que pretende ser "El Guggenheim d'Asturies".

El señor Niemeyer a ver obres como tolos xubilaos, que ye pa lo que ta.

MELINGO Y REPETTO

Equí vos dexo un vídeu con dos de los mios cantantes de tango preferíos, cantando xuntos.
Daniel Melingo y Cristobal Repetto.

THE TALLEST MAN ON EARTH

Déxovos un videu d'esti cantante que conocí va poco.

LOS FONTANES

Puestos a saca-y partíu a esto de tener un blog, dexo equí una semeya de l'ascensión de la selmana pasada a "Los Fontanes", unes de les cumbres más guapes y altes d'Asturies (2.417 m.), no cimero'l macizu "Les Ubiñes", conceyu de L.lena. Tando el día claru como taba, veíase'l cai nuevu d'El Musel, si mirabes pal norte, al oriente asomaben "Los Picos" y pal occidente podíen vese "Los Ancares" bercianos. Esto ye, toa Asturies a los pies.

dj koo-Volver a empezar

 
Siguimos col blog qu'entamamos nel cursu de diseñu web. Mándennos agora colgar ( ¿o dirase colingar en newasturianu?) un vídeu que tea nel youtube. Depués de pensar nun videu de La Hora Chanante, alcordeme d'esti videu nel que sal muncha xente conocío y con una música perguapa.

Que vos preste.

Primer pasu nel blog

Entrada de preba nel cursu de diseñu web.

Toi equí faciendo lo que va ser el blog de preba d'esti entamu de cursu de diseñu web. Pel momentu tamos metiendo imáxenes y viendo pa que llau ponemos la semeya y demás. La verdá, nun toi orgullosu d'ello, pero ye la primer vez que me pongo a facer un blog. Nun sé, siempre me dió muncha cascancia'l tema l'ordenador y siempre tuve abondo con toles hores qu'echo trabayando con él, faciendo diseños, maquetando cómics, revistes etc. Asina que'l mio tiempu llibre dedícolu a otres coses más importantes na vida como ye tomar unes botelluques de sidra colos collacios o facer un puquiñín de deporte, pero enxamás me dió por echar hores con estos aparatos. Pero, ¡ai fíu! tando nun cursu de diseñu web tienes de facer lo que te manden y hoi entamamos con un blog, igual mañana vamos siguir con un face-book y eso sí que me da cascancia.