FE D'ACIERTOS

Más abaxo apaecía una entrada, na que facía la confesión d'un fallu nel cómic de "Manzajú", al tracamundiar la botellina d'esti refrescu cola d'Escanciador de la mesma casa. Pero non, paez ser que la memoria nun me falló y el Manzajú tamién se comercializara nesti tipu de botelles, asina qu'el fallu nel cómic ye namás la etiqueta de la botellina qu'apaez na páxina 26.

La semeya correspuende al collaciu y dibuxante Marcos De Las Heras que la topara nuna vitrina del muséu del ferrocarril de Xixón. (Gracies Marcos)

TOI EN CUARENTENA

De la que cumplí 28 años, viénoseme a la tiesta la conocía como “llista negra de las 27” (taba’l cadabre de Cobain tovía caliente) alcuérdome perfectamente de lleer cuando morrió Kurt Cobain (cantante grunge que salía en piyama porque yera asina de gochu y acababa de llevantase pero la xente pensaba que yera un luk rompedor) lider de Nirvana, que la so ma-y dixera:
-Fíu, cuídate qu’andes tou enyoquicíu, nun vaigas entrar nel fatídicu club de los 27.
Daquella, ensin internet, había que buscase la vida, asina busqué en llibros de la historia del rock y alcuérdome que nesa mesma llista taben Jimmy Hendrix (un negru vistíu de colorinos que quemaba guitarres) Janis Joplin (una h.ipi con un chorru voz a lo Belén Esteban pero bien canalizáu, que si te metía un glayíu a la oreya quedábente los pelos como Punset) Brian Jones (un Rolling Stone al que nun veremos como-y queda la cara de vieya) y Jim Morrison (otru h.ipi aventadón que-y daba a tolo que se movía, diba al desiertu a ponese hasta’l culu, taba emperráu en cambiar el mundu y predicar l’amor).
Caro qu’agora con internet, pueden vese munchos otros finaos a esa mesma edá, un d’ellos Robert Johnson (el que-y vendió l’alma al diañu sigún la peliculina aquella del Ralph Macchio, el de Karate Kid “Cruce de caleyes”) si hai curiosidá mirái wiquipedia:


http://es.wikipedia.org/wiki/Club_27


Col pasu’l tiempu alcuérdome, caro ta, de cuando superé los 33, la edá de Xesucristo (una especie de Jim Morrison xudíu qu’armó la de mio madre, montaba botellonos, facía esquí acuáticu, sacaba muertos del nichu, desguazaba mercaos… nun quemaba caxeros automáticos porque nun los había. Tamién-y tenía afición a lo del desiertu anque nun hai constancia de que-y diese al peyote).


Entós acabo de llegar a los 40 y caro, ye’l momentu de ver los que morrieron a los 39. Si a los 27 morrieron rockeros drogadictos y a los 33 un venáu que dicía que veía seres d’otra dimensión y que falaba con ellos, a los 39  la cosa ponse muncho más serio, equí hai xente que fizo coses, munchu revolucionariu, mirái:


-Farabundo Martí (1893-1932): Un puntu que creyó que podía llevar la xusticia y la igualdá al so país El Salvador y llibralu de la oligarquía sostenida polos Estaos Xuníos. Matolu la dictadura militar, sofitada polos yanquis, namás llegar al poder. La so obra inspiró la guerrilla salvadoreña, el Frente Farabundo Martí de Liberación Nacional, FMLN.


-Augusto César Sandino (1895-1934): Fexo más o menos lo mesmo que Farabundo Martí nel so país, Nicaragua. La so muerte foi ordenada directamente dende la embaxada de los EE.XX. La guerrilla nicaragüense llevaba’l so nome Frente Sandinista de Liberación Nacional FSLN.


-Buenaventura Durruti (1896-1936) perdonáime qu’esti tenía 40 años y 3 meses: El cazurru más revoltosu de la historia (muncho más que Zapatero) yera al sindicalismu lo que Mourinho al fútbol, discutía con tou dios, políticos, sindicalistes, hasta colos demás dirixentes del so sindicatu, la CNT. Caro, si esto lo faes anguaño nuna sidrería, como muncho, igual lleves una hostia, pero caro, nos años 30 y en plena guerra civil… la cosa nun podía acabar bien.


-Malcolm X (mayu 1925- febreru 1965): Esti yera como’l Durruti negru de los Estaos Xuníos. Armó la de dios ye cristu p’acabar convertíu al Islam.


-Ernesto “Che” Guevara (1928-1967): ¿Qué dicir d’esti arxentinu? El Maradona de la guerrilla. Inventó los viaxes low-cost per sudamérica. Escribió un famosu manual “La guerra de guerrillas” onde cuenta tolo qu’hai que saber pa facer una guerrilla. Esti llibru usólu la CIA y l’exércitu Bolivianu pa garralu faciendo senderismu pelos montes de La Higuera (La Figar).


-Martin Luther King (1929-1968): Ser negru nos Estaos Xuníos y dicir que yes igual que los blancos ye dir provocando. Diéron-y’l premiu Nobel de la paz, lo mesmo qu’a Obama, lo único ye qu’él si que se lo currara.


Aparte d’esta riestra de treintaynueveañeros hai otros que ronden la edá que podíen tar tamién equí como García Lorca (el Boris Izaguirre de la república española, un pelín señoritu, pero escribía como dios. Matáronlu con 38 años.) John Lennon (anque podía tar meyor na llista de los rockeros. Yera’l Kurt Cobain de los 60-70, tamién tuvo casáu con una chifladona que p’aguantala… la puta so madre. Cantábenlo bien “Def Con Dos”: La culpa de todo la tiene Yoko Ono / y el espíritu de Lennon que le sale por los poros.)


Tamién cerquina taría José Martí (1853-1895) políticu, escritor y ideólogu de la independencia cubana, pero 42 años… esa ye otra historia.

WEB DE FELPEYU

A la fin, depués d'un mes de trabayu colgamos la nueva web de Felpeyu cola imaxen corporativa de los 20 años, hai que dir puliendo munches coses, tovía falta ponela en castellanu y n'inglés etc. Creyemos que va prestar especialmente la sección de les semeyes. Aprovechamos amás pa pidir dende equí semeyes que tengáis del grupu, col envís de dir faciento galeríes más grandes y prestoses.



Pa dir a la web calcái equí, namás:

www.felpeyu.com


Besos pa toos y toes.

¿POR QUÉ FACEMOS LES COSES?

Marín, Sandra, Santi, Jorge García, Guillermo, Pedro, Fonso y Ruma.

Paez una entrada filosófica, pero ye muncho más cenciella ¿por qué facemos lo que facemos? Nel mio casu, hai tiempu trabayé na enseñanza un par de años. Dexélo, nun yera'l peor trabayu que fixere na mio vida, pero tampoco ye que me preste especialmente aguantar adolescentes malcriaos (qu'esi ye'l mayor problema "los padres"). Dexélo principalmente porque d'aquella tenía abondu trabayu col mio grupu, Felpeyu. Tuvimos unos añucos mui prestosos, tres xires per Australia, Canadá, Polonia, Líbano, Dinamarca, Suecia, Francia, Portugal, Italia... nun ganaba nin de llueñe lo que gana un profesor, pero tuve la oportunidá de facer lo que me presta y fícelo ensin duldalo. Agora toi trabayando pa volver a dar clases y la cosa ta enforma difícil, pero nun m'arrepiento de nada.

El tema al que voi, ye qu'un día, na nuestra tercer xira per Australia (marzu-abril 2003), volvimos a Bathurst, un pueblín de Nueva Gales del Sur onde tuviéramos na primer xira nel 2000 y onde fixéremos perbonos collacios, una riestra de veteranos músicos. Llegábemos frayaos, depués d'un mes de xira cola pila kilómetros qu'hai que facer per eses tierres, conduximos tol día, igual 800 km., nun tocábemos esa nueche, sinón al otru día, pero pa esta xente yera perimportante que fuéremos. Convidáronnos a una barbacoa como avecen los australianos y de la que tábemos fartucos dixéronnos que nos repanchingásemos, que diben tocar pa nosotros. Resulta qu'esta xente, folquis de 50 a 60 años, depués de tar tola vida tocando música irlandesa, bluegrass norteamericanu y bush-music australiana, fixeren un grupu de música asturiana tres de conocenos a nosotros. La primer vez que sintieron falar d'Asturies na so vida foi en 2000, cuando nos conocieron y agora taben tocando pa nosotros col so nuevu proyectu musical "Señor Cabrales". Nesi momentu, de verdá que te pasen tolos dolores de la incomodísima furgo xaponesa que llevábemos, date igual que depués de tar siete selmanes fuera casa vuelvas con doscientesmil pesetes, date igual nun tar cotizando pa la xubilación, la razón pola que faes música ye por transmitir lo que yes, pol tratu humanu. Viendo a aquellos paisanos tocar muñeres y saltones asturianos ye cuando ves más xacíu a lo que faes.

Otru momentu emotivu pa mi, foi en 2006 tocando na "reisada" del conceyu d'Ayande. Esta fiesta consiste en dir antroxaos pelos pueblos del conceyu, tocando, cantando y pidiendo l'aguinaldu. Diego, el nuestru gaiteru, d'aquella taba ellí de mayestru de gaita y xunto colos sos alumnos, entamaron la recuperación d'esta folixa que llevaba 40 años que nun se facía. Fuimos de casa en casa, la xente encantao, sacaba rosquielles, bizcochu, vinu, oruxu... Llegamos a una casa aú vivía una muyerina sola mui mayor. Ellí tábemos tocando, tolos felpeyos más los alumnos de Diego, con Xosé Ambás cantando y una reciella de xente mazcarao pa una sola espectadora. La muyer delantre d'aquello emocionose,  quién sabe a quién echaba en falta, aú la llevaben les sos alcordances, tal parecía que llegábemos 40 años tarde.

Esti día, pasome algo asemeyao. Llamóme Guillermo, un compañeru míu de la escuela depués de lleer el mio tebéu "Manzajú" que-y regalara la so ma en navidá y nel qu'apaez nunes viñetes. Dicía que-y prestaría veme, lleva munchos años fuera d'Asturies y ye raro coincidir. Ensin munchu tiempu de preparación, contacte con Jorge Marín, otru de los collacios del cole y quedamos pa tomar unes botelluques de sidra ocho compañeros d'aquella. Había xente que nun vía igual fai 25 años.

Namás por esos momentos d'alcordances colos mios collacios del cole valieron la pena toles hores qu'eché faciendo'l Manzajú.

ENTREVISTA EN LA VAINA

Una entrevista que me fixo'l mio collaciu Javi Lueje el día de la firma d'exemplares en La Vaina, Xixón.

DE GLAYÍOS Y CHILLÍOS

La escultura de Chillida vendía como chatarra por 30 €.

-Ye mui curiosu'l tema l'arte, tolo que da de falar, d'esfalanciar, d'escribir, la de perres que mueve, pero la so ensencia mesma, munches veces escápasenos. Muncho llevo discutío dende qu'estudié n'Artes y Oficios del 88 al 90 (qu'agora llámenlo "Escuela d'Artes" nun vaigan confundilos con trabayadores) na primer promoción del bachilleratu artísticu n'Asturies, al rodiu de qué ye eso del arte. Ún de los más necios a la hora de discutir de too esto ye'l mio queríu y  non por ello menos pelma Miguel Rojo.  Tenemos a toles nuestres amistaes frites col tema. Discutiendo con esti collaciu, al qu'almiro como creador y quiero fegadalmente, enxamás pasamos del primer  asaltu , "la definición", a mi préstame muncho poneme estupendu depués de tomar unos culinos, a lo Fernando Arrabal col so famosu:

-El mineralismu va a llegarrrr!!!

Pero xuro que namás intento dar la definición que diz el ciccionariu de l'Academia de la Llingua Asturiana (-Acción humana pa espresar idees, emociones, percepciones, conceptos etc. per mediu de recursos plásticos, llingüísticos o sonoros. Más o menos) A lo qu'amiesto lo que dicen la mayoría de los antropólogos: los rasgos fundamentales que diferencien a les persones de los animales son la consciencia, la ellaboración de mensaxes complexos y la cultura (entendiendo cultura como esa riestra de deprendimientos que pasen d'una xeneración a otra y que nun se lleven nos xenes). Too esto, na estaya na que meyor ta reflexao nel so conxuntu ye nel fechu artísticu. Un animal fai arquitectures, tien estructures polítiques, exércitos, medicina... pero nun tien capacidá artística (val, sigún Punset y el mio collaciu Isidro hai unos paxarinos qu'acuriosen el ñeru con un xacíu mui estéticu). Resumiendo, lo que más nos alloña de los animales ye esa capacidá artística, ye lo que nos fai más humanos.

Estes son les movides que nos dedicamos a discutir peles sidreríes, porque tando como ta l'Sporting...

 

Caro qu'esti día, garro'l periódicu y veo lo del camión que robaron con obres de nun sé cuantos artistes, Botero, Saura, Tapies, Picasso, Chillida, etc. Y depués d'oyer al galerista diciendo que yera un robu bien pensáu, fechu por profesionales... ¡Ai mamina que me mexo! Lleo unos díes depués que nin profesionales nin hosties, yeren una reciella manguanes qu'intentaron vender una escultura de Chillida nuna chatarrería al pesu, por 30 loros.

 

Esto sí que me dió que pensar, fuera de les grandilocuencies creatives, de los egos perinflaos, de les obrones culturalones con mayúscules, esto sí qu'humaniza al arte, un chorizu pal qu'un fierru ye un fierru. Humaniza al arte, pero al chorizu ¿humanízalu o animalízalu? Nun lo tengo mui claro.

PD: Namás quiero facer una confesión p'acabar esta entrada. Yo tamién tuve una etapa Oteizo-Chillidesca na facultá, de la que fice la especialidá d'escultura y dende entós arrastro fierronos tochamente soldaos de mudanza en mudanza y yá llevo unes cuantes. Por favor, que me den el númeru de la chatarrería esa que-yos les vendo toes al pesu. Sedría la mio única posibilidá de cotizame a la vera de Chillida.

MANZAJÚ Y WEB

Toi un pelín vagu col tema'l blog. La verdá ye qu'impúseme un arrestu domiciliariu pa tener preparada la web del mio grupu, Felpeyu a primeros d'añu. Namás salí a una firma d'exemplares nel chigre La Vaina de Xixón, que tuvo mui prestosa, con muncha xente conocío y un ambiente familiar. Val, tamién salí a una cena colos collacios a base de centollos y cava, pero esa ye otra historia. El casu ye que con tol tema esti del Manzajú, el mio profesor de diseñu web, Iván Cepedal, apurrióme un anunciu de Manzajú nel ABC nos años 70, nel qu'apaez la botellina auténtica del Manzajú que bebíemos n'aquella dómina. La botella que yo usé pa los dibuxos ye tamién d'un productu de la marca Escanciador pero ye diferente, siempre pasen estes cose, tas tiempu buscando una cosa y apaez a la fin cuando yá nun hai remediu. Habrá qu'esperar a una nueva edición pa poner la botella que correspuende. Fe d'errores.