SEARCHING FOR SUGAR MAN

-Anueche, siguí afitando la mio pasión pol cine documental, tuve viendo una película que tenía munches ganes de ver "Searching for Sugar Man". Ganadora del últimu Óscar a la meyor película documental, premiu Bafta y nun sé cuantos más. Esta ye la sinopsis:

"A entamos de los 70, un músicu norteamericanu d'orixe mexicanu llamáu Sixto Rodríguez, foi descubiertu nun chigre de Detroit por dos productores que namoráronse de les sos melodíes y de les sos lletres. Grabáron-y un discu qu'ellos camentaben diba asitialu como ún de los grandes de la so xeneración. Por embargu, l´ésitu enxamás llegó. El cantante desanició ente rumores al rodiu'l so suicidiu nel escenariu al acabar un conciertu. Mientres la figura l'artista s'escaecía, una grabación pirata atopada na Sudáfrica l'Apartheid foi convirtiéndose nun fenómenu. Dos fans sudafricanos empérrense en saber qué foi en verdá lo que-y pasó al so ídolu."

Acoyonante de verdá, una historia d'humanidá y d'amor pola música pero que sobre manera confirma lo que llevo diciendo dende fai munchos años, la música ye maravillosa, componer, tocar, el contactu cola xente... Pero lo que la rodea, los intermediarios ente'l músicu y el públicu, los directivos de les compañíes de discos, los managers, les distribuidores, los xestores de derechos d'autor son (con dalgunes escepciones como en tolos mundos) una reciella de "FÍOS DE LA GRAN PUTA" (perdón a les sos madres que nun tienen culpa de nada, pero nun se m'ocurre otra forma de llamalos).

Hai que dar gracies a los qu'investigaron la vida y obra de Sixto Rodríguez por descubrinos a un músicu que tien que tar nel sitiu que-y correspuende, ente los más grandes de la so xeneración.

Hai que vela ensin escuses.

GOOD BYE, PACHU

Anueche volví a ver la película "Good Bye, Lenin". Pal que nun la viera tovía, que nun siga lleendo porque voi a destripá-yla.

El protagonista ye un rapaz, fíu d'una fiel militante'l Partíu Socialista Unificáu de la RDA. A la madre, péga-y un "pedrocarrascu" n'ochobre de 1989 y queda en coma a lo llargo d'ocho meses. Mientres ta la probe ente Candás y Lluanco, cai el muru de Berlín y entama a medrar el capitalismu, camín de la reunificación alemana, a pasos "axitanaos", como dicía un paisanu. Escontra tolos pronósticos, la muyer sal del coma, pero col coral tan feble que'l mínimu sustu podría matala. Entós, el protagonista decide facer como si nenguna d'estes coses pasara y siguieran viviendo nun estáu socialista. Convierte'l pisu familiar nel últimu reductu de l'Alemaña d'Erich Honecker.

Siempre que veo esti filme, pienso en como sería la versión española, "Good Bye, Pachu". La cosa podía ser más o menos asina, escondiéndo-y a la madre los Interviús pa que nun s'enterara del destape, quitándo-y la segunda cadena (el UHF) pa que nun viera "La Clave", camuflando los productos multinacionales dientro de los vieyos tarros de les autárquiques marques patries...

L'esconsueñu de la madre podía llevanos al 23F, pa poder sentir les marches militares na radio, seis años. Más complicao sería recrear la escena cumal de la película, na que vese un helicópteru llevando colingada una estatua de Lenin, qu'al pasar delantre la madre, paez mira-y a los güeyos y dicí-y adiós. Na versión española, viendo cuando entamaron a quitar los muñeconos del ferrolanu, llevaríanos a tener en coma a la paisana treinta o treintaicinco años.

Nada, que diba ser un truñu de película, porque a una franquistona d'esa dómina, de xuru que-y prestaría ver qu'España Una Grande y Libre sigue en manes d'ellos.

A diferencia de la versión orixinal, lo que nun dexó Pachu foi un estáu dividíu y pendiente d'una reunificación.

¿O sí?

ANGOULÊME 2012

La selmana pasada tuve nel Festival Internacional del Cómic d'Angoulême, dexando'l mio aisllamientu comiqueru per unos díes. Foi una visita mui prestosa por volver ver a collacios de siempre y facer nuevos collacios, ver lo que pasa nel cómic francés (que ye muncho) y internacional, especialmente no que cinca al cómic independiente. Charres, esposiciones, ver como trabayen los mayestros de siempre y la xente mozo.

Pongo equí unes semeyes d'esos díes.

El dibuxante asturianu Alfonso Zapico y  el dibuxante de Castelló Pep Domingo col so dibuxu invisible.

El Pep y el Ruma.

Delantre de la esposición d'Art Spiegelman.

Esposición dedicada al cómic español. Un montaxe mui prestosu.

Alfonso y yo con un señor de barba.

Alfonso y Manuela, grandes anfitriones.

Una de les muries pintaes d'Angoulême.

Esposición d'Art Spiegelman. Páxines de Maus.

María Villanueva na esposición d'Art Spiegelman.

Semeya del hermanín  d'Art Spiegelman muertu nel campu concentración y el pasaporte la so má.

Esposición d'Art Spiegelman.

AGUANTANDO CACHONES

Acabo d'entamar un blog/fanzine dixital pa dir colgando páxines de cómic na rede.
Pinchái equí y que vos preste: http://aguantandocachones.blogspot.com/

Salú.

RUMA BARBERO

JOSÉ LUIS SAMPEDRO

Hai tiempu que nun meto coses nel blog, cuando me pongo a trabayar nun cómic casi nun me llevanto nin pa mexar, asina qu'aprovecho qu'acabo d'emocioname otra vegada oyendo a esti home, que debía tar nun conseyu d'ancianos falándonos tolos díes, pa compartilo.

¿QUIÉN TA DETRÁS D'ESTA XENTE?

¿Quién ta detrás d'esta xente? Ye la entruga que se faen los voceros de los dos partíos MAYORITARIONOS, tanto'l PP como'l PSOE, que falaben de les revueltes nel mundu árabe como un exerciciu de democracia, mientres que descalifiquen a la xente que pide una democracia real nel so país.

¿Quién los ta manipulando? Ye lo que dicen nos medios de comunicación.

Pero... ¿Quién ta detrás de la vuestra DEMOCRACIONA? ¿Quién ye'l que nos punxo una xefatura d'estáu hereditaria? ¿Quién llantó una llei electoral na que nuna provincia como Soria con 95.000 habitantes, van votar 3 monxes y un par d'oveyes y tien 3 diputaos mientres un partíu como Izquierda Xunida con 963.040 votos tien 2 diputaos?

Esti, ensin duldalo sedría'l primer pasu, cambiar la llei electoral pa facela porporcional, más xusta. Caro qu'esi cambiu supón que voten a favor d'una reforma de la CONSTITUCIONONA 3/4 partes de la cámara, convocar elecciones y que la nueva cámara de representantes volviera a votar a favor de la reforma na mesma proporción, 3/4.

¿Cómo ye posible que'l director del Fondu Monetariu Internacional seya un socialista con un coche de 100.000 € y que resida n'hoteles de 3.000 € la nueche mientres nos manda a los demás apretanos el cinchu? Aparte d'andar faciendo'l Sandokán coles trabayadores que se-y crucen pel camín.

Más cerquina de nosotros ¿Cómo ye posible que l'ARZOBISPÓN d'Uviéu pida'l votu pa dalgún de los partíos qu'al so xuiciu defiendan la familia y estos seyan PP cola lideresa Isabel Pérez-Espinosa DIVORCIADONA dos veces y FAC col DIVORCIADÓN tamién dos veces Francisco Álvarez Cascos? ¿Cómo ye posible qu'al lláu d'un señor como Álvarez Cascos qu'en 1981 dixo: "Franco es una figura histórica de envergadura a la que admiro", vaigan de la manina históricos  del asturanismu como Carlos Rubiera (sí, sí el compositor de "La Capitana") Arias-Cachero, Inaciu Iglesias (editor de Les Noticies ) o el mio paisanu Xicu Yepes? Amás de Pepe'l Ferreiro, al que munchos arrepentímonos de dar la nuestra firma de sofitu pa la plataforma d'apoyu a la so permanencia nel cargu de director del muséu de Grandas, yá que vendiósenos el tema como daqué alloñao de la política, p'a la fin quedar con cara bobos una vuelta más.

Yo personalmente voi dir a votar esti domingu, tovía nun fui quién a absteneme dende que tengo drechu al votu, pero tamién ye'l momentu d'echanos a la cai a esixí-yos lo que ye nuestro.

PD: Equí podéis descargar la entrevista a Cascos na Fueya'l Llunes de Xixón, nun tien desperdiciu:

usuarios.multimania.es/hermanosenlucha/cascosentrev.pdf

BIN LADEN Y EL GRECIAN 2000

Nuna semeya enantes de 2007 y na so última aparición en 2007

Como ye'l mio vezu, yo siempre ando fixándome nes partes más fates de les noticies y nel casu del asesinatu de Bin Laden tamién me pasó. Resulta que'l puntu esti, qu'entamó les qu'entamó, que mandó a tanta xente a morrer en nome d'un ser qu'esiste n'otra dimensión cola promesa de dir al paraisu y atopase con una reciella vírxenes y de pasu facer saltar pelos aires a tantu "infiel", que creen n'otru ser qu'esiste n'otra diemensión, vivía como un cura, nun xalé a pocos kilómetros d'Islamabad con dos de les sos muyeres y una riestra fíos amás d'usar GRECIAN 2000 pa les canes de la barba. ¡¡¡Cago'n ros!!! andar a les qu'andaba y perder tiempu en teñir la barba ye un actu de coquetería al altor d'un punki, que ye la tribu urbana más coqueta qu'esiste (pensái qu'echen dos hores polo menos encofrando la cresta y escoyendo los perendengues que van llevar esa nueche), esti fechu conviértelu nel Lauren Postigo de los muyaidines. Y si lo d'esti puntu nun tien nome, lo de los yanquis tamién ronca'l mangu, pasándose pel arcu'l triunfu toles lleis internacionales, métense nun país soberanu a tiros, depués marchen col muertu y acáben tirándolu a la mar (si ye que creyemos la versión que nos cunten) cola sensibilidá que tien el mundu musulmán, qu'entierra a los sos fieles ensin caxa, con una sabanina de llinu pa que los merucos nun tengan qu'andar furando la madera. Cada pueblu ye lo que ye y nel casu de los yanquis, la cultura del pistoleru sigue viva. Los asturianos somos más de "gárrame que lu mato" y caro entre uno y otro métensenos hasta Cuadonga... pero esi ye otru tema. Ye tremendo ver que furrulen asina les DEMOCRACIONES, da lo mesmo los yanquis o los sos collacios como'l casu d'Uribe, ex-presidente de Colombia de la que se metieron en territoriu ecuatorianu pa matar a Raúl Reyes, segundu de les FARC, xugándose entamar una guerra. En fin, a ver si  se relaxa tol mundu y nun hai que llamentar más barbaridaes y los muyaidines qu'echen una moza lliberal, con esperiencia, palpable y nun aspiren a 72 vírxenes, qu'hai qu'esplicá-yoslo too (-Que nun va dolete... -Que sí qu'entra nesta postura... etc.)

PD: Lo que mete miedín peles pates tamién ye tar viendo una tertulia en CUATRO y que'l más centráu y con más chapeta nesti tema seya Jorge Vestringe.

FORGES, ESI GRANDE!!!

Llevo siguiendo'l trabayu de Forges dende neñu, ye un estilu d'humor que m'apasiona, llimpiu y con una retranca de la virxen anque fainme especial gracia los sos chistes más fatos y surrealistes como esti que salió l'añu pasáu nel país y que tengo de fondu d'escritoriu nel ordenador dende entós.

 

Valgan estes llínies d'homenaxe a Forges, merecidísimu Medalla d'Oru al Méritu nes Belles Artes 2010. L'humorista más llúcidu d'España de 40 años p'acá. Pa rematar una tira de 1976 mui políticamente incorrecta anguaño pero que me fai una gracia de la virxen.

NOVEDAES NA WEB DE FELPEYU

Piscinazu enantes de Canteros

Facemos esta entrada namás que pa dar anuncia de qu'acabamos de subir a la nuestra web una bona estrapallada de semeyes.

http://www.felpeyu.com/

Destaquen especialmente les de les xires australianes 2000 y 2001, Canadá 2001 amás de la xira pel Líbanu 2005 por ser les que más semeyes nueves lleven, anque tamién hai novedaes n'otres galeríes. Nesti momentu namás nos queda por meter semeyes de los años 1997 y 1999, la del 1998 tamién ta un pelín floxa. Agradecemos collaboraciones. 

Por exemplu, en 1997 tocamos en:

Conciertu presentación de "Tierra", Teatru Xovellanos, Xixón (Asturies), I Festival Intercélticu Comarca de la Sidra (Co. Villaviciosa, Asturies), Folk Segovia, Cairo Montenotte, Castello Spinola, Campo Liguria (Italia), Nueche Celta de Granda, Xixón (Asturies), Intercélticu de Tapia (Co. Tapia, Asturies), Noite Celta de Porcía (Co. El Franco, Asturies)

 En 1998 en:

Folixa de la Primavera (Mieres), Nueche de San Xuan (Xixón), Festival de Ancares-Seo (El Bierzo, Llión), Ortigueira (Coruña), Intercélticu de Moaña (Pontevedra), Xira italiana: Alassio, Brescia, Riva del Garda, setiembre 1998

En 1999 en:
Festival Folk de Ceutí (Murcia), I Festival Folk de Cartagena (Murcia), Xacobeo 99, (Llión), Noite Celta de Porcía (Co. El Franco, Asturies).

Gracies mui especiales a Sara Canteli, Eva y Guille Redondo por dexanos usar los archivos fotográficos de Carlos.

CRIANDO FLOXOS

Escolinos finlandeses esperando pol bus de la escuela.

Vivo al  llau del "Corazón de María" en Xixón, colexu que tien el so rellumón dientro la ciudá, anque lo que voi cuntar pasa tamién nes escules públiques. Ye normal qu'a la hora de salir, tea tola zona enllena d'autobuses y coches de los pas y les mas pa recoyer a los sos neños. El vezu normal ye que tean enriba les ceres, nos pasos de peatones o en doble fila peles cais secundaries de la redolada pero esti vienres foi ablucante. Venía yo en coche a les cinco la tarde y topeme con que nun sólo taben les cais pequeñes d'eses traces, taben tamién les dos víes principales a les que da'l mamotréticu edificiu d'hormigón, "Avenida Castiella" y "Avenida Pablo Iglesias", apinaes de coches y más coches, en tres fileres, cuatro... estes dos víes, son anches como qué se yo y con tres carriles. Pues bien había montáu un atascu de la de coyer, taba colapsáu'l tráficu hasta'l parque "Isabel la Católica" y la plaza toros, que yo viera. Namás había un carril pa subir pa "El Coto" que ye pa onde yo diba. Lo primero que te vien a la tiesta ye preguntáte: ¿qué pasó hoi equí?

Hasta que cayí na cuenta "TABA ORBAYANDO".

¡Cago'n ros! taba orbayando nun país onde lo normal ye que llueva más de la mitá de los díes, nun facía fríu nin llovía a mares, de verdá que cayíen cuatro gotuques, pero caro, hai que garrar al rapacín, o a la rapacina qu'agora ye mistu, a la puerta mesma la escuela y metelu baxo palio pal Audi, pal BMW, pal Mercedones o pal Seat, que tamién había, nun vaiga ser que-y mengüe'l Lacoste.

Nun pude más qu'alcordame d'unos collacios míos que viven en Filandia qu'un día comentaben qu'ellí nun pues llevar al neñu a la escuela, el rapacín tien de dir nel transporte escolar, que furrula como dios, pero tien qu'esperalu na parada, igual a 20 grados baxo cero. El razonamientu y el sentíu común de los finlandeses ye que los sos fíos ñacieron nun país con un clima mui duru y tienen de dir avezándose dende piquiñinos. Un puquiñín de sufrimientu tamién ye un bon aprendizaxe. Por eso, viendo los resultaos académicos de los escolinos finlandeses y de los nuestros, daste cuenta que los bonos resultaos entamen dende'l momentu mesmu de salir de casa... o si m'apures enantes.

FE D'ACIERTOS

Más abaxo apaecía una entrada, na que facía la confesión d'un fallu nel cómic de "Manzajú", al tracamundiar la botellina d'esti refrescu cola d'Escanciador de la mesma casa. Pero non, paez ser que la memoria nun me falló y el Manzajú tamién se comercializara nesti tipu de botelles, asina qu'el fallu nel cómic ye namás la etiqueta de la botellina qu'apaez na páxina 26.

La semeya correspuende al collaciu y dibuxante Marcos De Las Heras que la topara nuna vitrina del muséu del ferrocarril de Xixón. (Gracies Marcos)

TOI EN CUARENTENA

De la que cumplí 28 años, viénoseme a la tiesta la conocía como “llista negra de las 27” (taba’l cadabre de Cobain tovía caliente) alcuérdome perfectamente de lleer cuando morrió Kurt Cobain (cantante grunge que salía en piyama porque yera asina de gochu y acababa de llevantase pero la xente pensaba que yera un luk rompedor) lider de Nirvana, que la so ma-y dixera:
-Fíu, cuídate qu’andes tou enyoquicíu, nun vaigas entrar nel fatídicu club de los 27.
Daquella, ensin internet, había que buscase la vida, asina busqué en llibros de la historia del rock y alcuérdome que nesa mesma llista taben Jimmy Hendrix (un negru vistíu de colorinos que quemaba guitarres) Janis Joplin (una h.ipi con un chorru voz a lo Belén Esteban pero bien canalizáu, que si te metía un glayíu a la oreya quedábente los pelos como Punset) Brian Jones (un Rolling Stone al que nun veremos como-y queda la cara de vieya) y Jim Morrison (otru h.ipi aventadón que-y daba a tolo que se movía, diba al desiertu a ponese hasta’l culu, taba emperráu en cambiar el mundu y predicar l’amor).
Caro qu’agora con internet, pueden vese munchos otros finaos a esa mesma edá, un d’ellos Robert Johnson (el que-y vendió l’alma al diañu sigún la peliculina aquella del Ralph Macchio, el de Karate Kid “Cruce de caleyes”) si hai curiosidá mirái wiquipedia:


http://es.wikipedia.org/wiki/Club_27


Col pasu’l tiempu alcuérdome, caro ta, de cuando superé los 33, la edá de Xesucristo (una especie de Jim Morrison xudíu qu’armó la de mio madre, montaba botellonos, facía esquí acuáticu, sacaba muertos del nichu, desguazaba mercaos… nun quemaba caxeros automáticos porque nun los había. Tamién-y tenía afición a lo del desiertu anque nun hai constancia de que-y diese al peyote).


Entós acabo de llegar a los 40 y caro, ye’l momentu de ver los que morrieron a los 39. Si a los 27 morrieron rockeros drogadictos y a los 33 un venáu que dicía que veía seres d’otra dimensión y que falaba con ellos, a los 39  la cosa ponse muncho más serio, equí hai xente que fizo coses, munchu revolucionariu, mirái:


-Farabundo Martí (1893-1932): Un puntu que creyó que podía llevar la xusticia y la igualdá al so país El Salvador y llibralu de la oligarquía sostenida polos Estaos Xuníos. Matolu la dictadura militar, sofitada polos yanquis, namás llegar al poder. La so obra inspiró la guerrilla salvadoreña, el Frente Farabundo Martí de Liberación Nacional, FMLN.


-Augusto César Sandino (1895-1934): Fexo más o menos lo mesmo que Farabundo Martí nel so país, Nicaragua. La so muerte foi ordenada directamente dende la embaxada de los EE.XX. La guerrilla nicaragüense llevaba’l so nome Frente Sandinista de Liberación Nacional FSLN.


-Buenaventura Durruti (1896-1936) perdonáime qu’esti tenía 40 años y 3 meses: El cazurru más revoltosu de la historia (muncho más que Zapatero) yera al sindicalismu lo que Mourinho al fútbol, discutía con tou dios, políticos, sindicalistes, hasta colos demás dirixentes del so sindicatu, la CNT. Caro, si esto lo faes anguaño nuna sidrería, como muncho, igual lleves una hostia, pero caro, nos años 30 y en plena guerra civil… la cosa nun podía acabar bien.


-Malcolm X (mayu 1925- febreru 1965): Esti yera como’l Durruti negru de los Estaos Xuníos. Armó la de dios ye cristu p’acabar convertíu al Islam.


-Ernesto “Che” Guevara (1928-1967): ¿Qué dicir d’esti arxentinu? El Maradona de la guerrilla. Inventó los viaxes low-cost per sudamérica. Escribió un famosu manual “La guerra de guerrillas” onde cuenta tolo qu’hai que saber pa facer una guerrilla. Esti llibru usólu la CIA y l’exércitu Bolivianu pa garralu faciendo senderismu pelos montes de La Higuera (La Figar).


-Martin Luther King (1929-1968): Ser negru nos Estaos Xuníos y dicir que yes igual que los blancos ye dir provocando. Diéron-y’l premiu Nobel de la paz, lo mesmo qu’a Obama, lo único ye qu’él si que se lo currara.


Aparte d’esta riestra de treintaynueveañeros hai otros que ronden la edá que podíen tar tamién equí como García Lorca (el Boris Izaguirre de la república española, un pelín señoritu, pero escribía como dios. Matáronlu con 38 años.) John Lennon (anque podía tar meyor na llista de los rockeros. Yera’l Kurt Cobain de los 60-70, tamién tuvo casáu con una chifladona que p’aguantala… la puta so madre. Cantábenlo bien “Def Con Dos”: La culpa de todo la tiene Yoko Ono / y el espíritu de Lennon que le sale por los poros.)


Tamién cerquina taría José Martí (1853-1895) políticu, escritor y ideólogu de la independencia cubana, pero 42 años… esa ye otra historia.

WEB DE FELPEYU

A la fin, depués d'un mes de trabayu colgamos la nueva web de Felpeyu cola imaxen corporativa de los 20 años, hai que dir puliendo munches coses, tovía falta ponela en castellanu y n'inglés etc. Creyemos que va prestar especialmente la sección de les semeyes. Aprovechamos amás pa pidir dende equí semeyes que tengáis del grupu, col envís de dir faciento galeríes más grandes y prestoses.



Pa dir a la web calcái equí, namás:

www.felpeyu.com


Besos pa toos y toes.

¿POR QUÉ FACEMOS LES COSES?

Marín, Sandra, Santi, Jorge García, Guillermo, Pedro, Fonso y Ruma.

Paez una entrada filosófica, pero ye muncho más cenciella ¿por qué facemos lo que facemos? Nel mio casu, hai tiempu trabayé na enseñanza un par de años. Dexélo, nun yera'l peor trabayu que fixere na mio vida, pero tampoco ye que me preste especialmente aguantar adolescentes malcriaos (qu'esi ye'l mayor problema "los padres"). Dexélo principalmente porque d'aquella tenía abondu trabayu col mio grupu, Felpeyu. Tuvimos unos añucos mui prestosos, tres xires per Australia, Canadá, Polonia, Líbano, Dinamarca, Suecia, Francia, Portugal, Italia... nun ganaba nin de llueñe lo que gana un profesor, pero tuve la oportunidá de facer lo que me presta y fícelo ensin duldalo. Agora toi trabayando pa volver a dar clases y la cosa ta enforma difícil, pero nun m'arrepiento de nada.

El tema al que voi, ye qu'un día, na nuestra tercer xira per Australia (marzu-abril 2003), volvimos a Bathurst, un pueblín de Nueva Gales del Sur onde tuviéramos na primer xira nel 2000 y onde fixéremos perbonos collacios, una riestra de veteranos músicos. Llegábemos frayaos, depués d'un mes de xira cola pila kilómetros qu'hai que facer per eses tierres, conduximos tol día, igual 800 km., nun tocábemos esa nueche, sinón al otru día, pero pa esta xente yera perimportante que fuéremos. Convidáronnos a una barbacoa como avecen los australianos y de la que tábemos fartucos dixéronnos que nos repanchingásemos, que diben tocar pa nosotros. Resulta qu'esta xente, folquis de 50 a 60 años, depués de tar tola vida tocando música irlandesa, bluegrass norteamericanu y bush-music australiana, fixeren un grupu de música asturiana tres de conocenos a nosotros. La primer vez que sintieron falar d'Asturies na so vida foi en 2000, cuando nos conocieron y agora taben tocando pa nosotros col so nuevu proyectu musical "Señor Cabrales". Nesi momentu, de verdá que te pasen tolos dolores de la incomodísima furgo xaponesa que llevábemos, date igual que depués de tar siete selmanes fuera casa vuelvas con doscientesmil pesetes, date igual nun tar cotizando pa la xubilación, la razón pola que faes música ye por transmitir lo que yes, pol tratu humanu. Viendo a aquellos paisanos tocar muñeres y saltones asturianos ye cuando ves más xacíu a lo que faes.

Otru momentu emotivu pa mi, foi en 2006 tocando na "reisada" del conceyu d'Ayande. Esta fiesta consiste en dir antroxaos pelos pueblos del conceyu, tocando, cantando y pidiendo l'aguinaldu. Diego, el nuestru gaiteru, d'aquella taba ellí de mayestru de gaita y xunto colos sos alumnos, entamaron la recuperación d'esta folixa que llevaba 40 años que nun se facía. Fuimos de casa en casa, la xente encantao, sacaba rosquielles, bizcochu, vinu, oruxu... Llegamos a una casa aú vivía una muyerina sola mui mayor. Ellí tábemos tocando, tolos felpeyos más los alumnos de Diego, con Xosé Ambás cantando y una reciella de xente mazcarao pa una sola espectadora. La muyer delantre d'aquello emocionose,  quién sabe a quién echaba en falta, aú la llevaben les sos alcordances, tal parecía que llegábemos 40 años tarde.

Esti día, pasome algo asemeyao. Llamóme Guillermo, un compañeru míu de la escuela depués de lleer el mio tebéu "Manzajú" que-y regalara la so ma en navidá y nel qu'apaez nunes viñetes. Dicía que-y prestaría veme, lleva munchos años fuera d'Asturies y ye raro coincidir. Ensin munchu tiempu de preparación, contacte con Jorge Marín, otru de los collacios del cole y quedamos pa tomar unes botelluques de sidra ocho compañeros d'aquella. Había xente que nun vía igual fai 25 años.

Namás por esos momentos d'alcordances colos mios collacios del cole valieron la pena toles hores qu'eché faciendo'l Manzajú.

ENTREVISTA EN LA VAINA

Una entrevista que me fixo'l mio collaciu Javi Lueje el día de la firma d'exemplares en La Vaina, Xixón.

DE GLAYÍOS Y CHILLÍOS

La escultura de Chillida vendía como chatarra por 30 €.

-Ye mui curiosu'l tema l'arte, tolo que da de falar, d'esfalanciar, d'escribir, la de perres que mueve, pero la so ensencia mesma, munches veces escápasenos. Muncho llevo discutío dende qu'estudié n'Artes y Oficios del 88 al 90 (qu'agora llámenlo "Escuela d'Artes" nun vaigan confundilos con trabayadores) na primer promoción del bachilleratu artísticu n'Asturies, al rodiu de qué ye eso del arte. Ún de los más necios a la hora de discutir de too esto ye'l mio queríu y  non por ello menos pelma Miguel Rojo.  Tenemos a toles nuestres amistaes frites col tema. Discutiendo con esti collaciu, al qu'almiro como creador y quiero fegadalmente, enxamás pasamos del primer  asaltu , "la definición", a mi préstame muncho poneme estupendu depués de tomar unos culinos, a lo Fernando Arrabal col so famosu:

-El mineralismu va a llegarrrr!!!

Pero xuro que namás intento dar la definición que diz el ciccionariu de l'Academia de la Llingua Asturiana (-Acción humana pa espresar idees, emociones, percepciones, conceptos etc. per mediu de recursos plásticos, llingüísticos o sonoros. Más o menos) A lo qu'amiesto lo que dicen la mayoría de los antropólogos: los rasgos fundamentales que diferencien a les persones de los animales son la consciencia, la ellaboración de mensaxes complexos y la cultura (entendiendo cultura como esa riestra de deprendimientos que pasen d'una xeneración a otra y que nun se lleven nos xenes). Too esto, na estaya na que meyor ta reflexao nel so conxuntu ye nel fechu artísticu. Un animal fai arquitectures, tien estructures polítiques, exércitos, medicina... pero nun tien capacidá artística (val, sigún Punset y el mio collaciu Isidro hai unos paxarinos qu'acuriosen el ñeru con un xacíu mui estéticu). Resumiendo, lo que más nos alloña de los animales ye esa capacidá artística, ye lo que nos fai más humanos.

Estes son les movides que nos dedicamos a discutir peles sidreríes, porque tando como ta l'Sporting...

 

Caro qu'esti día, garro'l periódicu y veo lo del camión que robaron con obres de nun sé cuantos artistes, Botero, Saura, Tapies, Picasso, Chillida, etc. Y depués d'oyer al galerista diciendo que yera un robu bien pensáu, fechu por profesionales... ¡Ai mamina que me mexo! Lleo unos díes depués que nin profesionales nin hosties, yeren una reciella manguanes qu'intentaron vender una escultura de Chillida nuna chatarrería al pesu, por 30 loros.

 

Esto sí que me dió que pensar, fuera de les grandilocuencies creatives, de los egos perinflaos, de les obrones culturalones con mayúscules, esto sí qu'humaniza al arte, un chorizu pal qu'un fierru ye un fierru. Humaniza al arte, pero al chorizu ¿humanízalu o animalízalu? Nun lo tengo mui claro.

PD: Namás quiero facer una confesión p'acabar esta entrada. Yo tamién tuve una etapa Oteizo-Chillidesca na facultá, de la que fice la especialidá d'escultura y dende entós arrastro fierronos tochamente soldaos de mudanza en mudanza y yá llevo unes cuantes. Por favor, que me den el númeru de la chatarrería esa que-yos les vendo toes al pesu. Sedría la mio única posibilidá de cotizame a la vera de Chillida.

MANZAJÚ Y WEB

Toi un pelín vagu col tema'l blog. La verdá ye qu'impúseme un arrestu domiciliariu pa tener preparada la web del mio grupu, Felpeyu a primeros d'añu. Namás salí a una firma d'exemplares nel chigre La Vaina de Xixón, que tuvo mui prestosa, con muncha xente conocío y un ambiente familiar. Val, tamién salí a una cena colos collacios a base de centollos y cava, pero esa ye otra historia. El casu ye que con tol tema esti del Manzajú, el mio profesor de diseñu web, Iván Cepedal, apurrióme un anunciu de Manzajú nel ABC nos años 70, nel qu'apaez la botellina auténtica del Manzajú que bebíemos n'aquella dómina. La botella que yo usé pa los dibuxos ye tamién d'un productu de la marca Escanciador pero ye diferente, siempre pasen estes cose, tas tiempu buscando una cosa y apaez a la fin cuando yá nun hai remediu. Habrá qu'esperar a una nueva edición pa poner la botella que correspuende. Fe d'errores.

PRESENTACIÓN MANZAJÚ

Ando col blog un pelín desatendíu, munchu trabayu y munchu cursu últimamente. Prometo mayor actividá a partir del 1 d'avientu. Toi acabante de facer la presentación del mio cómic "Manzajú", dientro de Festival de Cine de Xixón y salieron delles entrevistes y artículos na prensa rexonal, qu'igual vos prestaba lleer. Tendrévos avisaos del día que faiga una xornadina de firmes.


Besos y gracies.

RUMA


Artículu del mio collaciu Miguel Rojo en El Comercio:

http://www.elcomerciodigital.com/v/20101122/cultura/cosecha-manzaju-ruma-barbero-20101122.html

Entrevista de Ana Zapico en El Comercio:

http://www.elcomerciodigital.com/20101121/mas-actualidad/cultura/comic-201011211151.html

Antón García en La Nueva España:

http://www.lne.es/cultura/2010/11/19/pisar-memoria-pa-saca-zume/996079.html

Entrevista en Asturies.com:


http://www.asturies.com/node/13937

Entrevista en Les Noticies:

http://www.lesnoticies.com/lesnoticies/noticies/ruma-barbero-tovia-considera-poco-friki-llector-comics/7348

SAHARA LLIBRE

De la que trabayo suelo tar enchufáu a los cascos, col Spotify normalmente, pero dalguna vez tamién siento dalgún podcast d'emisores de radio. El mes pasáu, descubrióme'l mio collaciu Antón una ñata de programes mui prestosos, del programa Documentos de Radio Nacional de España. Nesti programa, podéis atopar documentales radiofónicos mui prestosos, nos que falen historiadores y xente que tuvo que ver col tema que tean tratando en cada momentu. Por exemplu, yo tuve oyendo un documentu de la revolución cubana, otru de Gardel y el que vos dexo equí col tema tan d'actualidá como ye'l Sahara y la so descolonización por parte d'España. Ye perinteresante sentir como falaba Felipe González a los saharauis enantes d'entrar nel gobiernu, minutu 50 más o menos. Que valga como recordatoriu d'un conflictu llatente, nuna tierra que pa les naciones xuníes sigue tando baxo alministración española.

Sahara 1975. Bidanis en el laberinto de las arenas (Documentos RNE)

MANZAJÚ

Dende que punxe a furrular esti blog, a la fin una entrada na que falo d'un trabayu propiu. Acaba de salir d'imprenta'l cómic "Manzajú", col que gané l'añu pasáu'l premiu "Alfonso Iglesias de Cómic" entamáu pola Conseyería de Cultura. Esti premiu, vieno a sumase a los premios lliterarios en llingua asturiana que yá había, ensayu, novela, poesía y lliteratura infantil. Tuvo dotáu con cierta cantidá económica (al que-y interese la cantidá ta nel BOPA) y la publicación de la obra. Pues esto ye, tovía nun sé si tardará en tar nes tiendes, namás sé que va facése la presentación el 23 d'esti mes de payares dientro de la programación del Festival de Cine de Xixón, yá vos confirmaré hora y llugar.

PD: agora podéis poneme a parir como faigo yo coles obres d'otros dientro d'esti blog.