lunes, 21 de febrero de 2011

CRIANDO FLOXOS

Escolinos finlandeses esperando pol bus de la escuela.
Vivo al  llau del "Corazón de María" en Xixón, colexu que tien el so rellumón dientro la ciudá, anque lo que voi cuntar pasa tamién nes escules públiques. Ye normal qu'a la hora de salir, tea tola zona enllena d'autobuses y coches de los pas y les mas pa recoyer a los sos neños. El vezu normal ye que tean enriba les ceres, nos pasos de peatones o en doble fila peles cais secundaries de la redolada pero esti vienres foi ablucante. Venía yo en coche a les cinco la tarde y topeme con que nun sólo taben les cais pequeñes d'eses traces, taben tamién les dos víes principales a les que da'l mamotréticu edificiu d'hormigón, "Avenida Castiella" y "Avenida Pablo Iglesias", apinaes de coches y más coches, en tres fileres, cuatro... estes dos víes, son anches como qué se yo y con tres carriles. Pues bien había montáu un atascu de la de coyer, taba colapsáu'l tráficu hasta'l parque "Isabel la Católica" y la plaza toros, que yo viera. Namás había un carril pa subir pa "El Coto" que ye pa onde yo diba. Lo primero que te vien a la tiesta ye preguntáte: ¿qué pasó hoi equí?
Hasta que cayí na cuenta "TABA ORBAYANDO".

¡Cago'n ros! taba orbayando nun país onde lo normal ye que llueva más de la mitá de los díes, nun facía fríu nin llovía a mares, de verdá que cayíen cuatro gotuques, pero caro, hai que garrar al rapacín, o a la rapacina qu'agora ye mistu, a la puerta mesma la escuela y metelu baxo palio pal Audi, pal BMW, pal Mercedones o pal Seat, que tamién había, nun vaiga ser que-y mengüe'l Lacoste.

Nun pude más qu'alcordame d'unos collacios míos que viven en Filandia qu'un día comentaben qu'ellí nun pues llevar al neñu a la escuela, el rapacín tien de dir nel transporte escolar, que furrula como dios, pero tien qu'esperalu na parada, igual a 20 grados baxo cero. El razonamientu y el sentíu común de los finlandeses ye que los sos fíos ñacieron nun país con un clima mui duru y tienen de dir avezándose dende piquiñinos. Un puquiñín de sufrimientu tamién ye un bon aprendizaxe. Por eso, viendo los resultaos académicos de los escolinos finlandeses y de los nuestros, daste cuenta que los bonos resultaos entamen dende'l momentu mesmu de salir de casa... o si m'apures enantes.

3 comentarios:

  1. puede decise más alto, más claro no. Y luego lo que ves dentro de los colegios...

    ResponderEliminar
  2. Ya nun hay paisanos comolos de enantes, Rumina.Ni polos de Lacoste: caen cuatro gotuques, y nun valen ni pa limpiar los cristales!

    ResponderEliminar
  3. eso pásame a min tolos díes al dir al tayu.Coches qu'engaramen enrriba les aceres atravesaos de les 4 ruedes y col combayamientu la policia.Despés salen-yos los fíos repunantes,caprichucos y pijos.

    ResponderEliminar